Паян чăвашсемшĕн питĕ пысăк уяв. Пирĕн шкулт та çак куна яланах паллă тăваççĕ. Уява пур класс та хутшăнчĕ. Елена Лисицынăпа Солнцева Кристина ертӳçĕсем тăрăшнипе вăл питĕ хаваслă иртрĕ. Ачасем чăваш çыравçисен сăввисене, юррисене янраттарчĕç. Марина Тимофеева хăй çырнă сăввисемпе паллаштарчĕ. Вăл хăй сăввисемпе районти конкурса та хутшăнчĕ.

Кашни класс сценка хатĕрлерĕ. Вĕренекенсем артистсенчен кая мар вылярĕç. Уйрăмах 5-мĕш класра вĕренекен Таня Ястребова, Денис Андреев, Амалия Матвеева, 6-мĕш класри Оля Ястребовăпа Марина Чернова, 8-мĕш класри Надя Андреева хăйсен сăнарĕсене ĕненмелле кăтартрĕç.

Чăваш тĕррисен куравĕ арçын ачасем хăма çине касса тунă тĕрĕ эрешĕсемпе пуянланчĕ. А.М. Иванов ертсе пынипе ачасем хăма çине касса ӳкерме вĕренсе пыраççĕ. Курав та пурне те килĕшрĕ.